Şimaliy-Avropa demokratik merkezi ve «İnternews-Ukraina» teşkilâtı Qırım meselesi ile oğraşqan jurnalistlerge tehnikiy yardımnıñ berilmesi boyünca programmanıñ başlanuvını ilân eteler.
Bu aqta Ukraina haber siyaseti naziriniñ Qırım meseleleri boyunca keñeşçisi Sergey Kostinskiy bildire.
«Professional tehnikiy donatuvnıñ elde etilmesi boyunca yarışta iştirak etecek muarririyet ve jurnalistler içün esas şartlar – iş tecribesi ve bugünki künde Qırım meselesiniñ aydınlatuvında areketçenliktir», – haber ete Kostinskiy.
Onıñ malümatına köre, tehnikiy yardım yalıñız mustaqil ekspert komissiyanıñ tevsiyesi ile berilecektir.
«Donatuvnınıñ şekli ve fiyatı işbu muarririyet ya da jurnalistniñ ihtiyacına ve komissiya tevsiyesine köre berilecek», – dey Kostinskiy.
Leyhağa köre, bir muarririyet 10 biñ yevro miqdarında tehnikiy yardımnı, bir jurnalist ya bloger – 2 biñ yevro miqdarında yardımnı elde ete bile.
Tehnikiy yardımnı elde etkenler 2016 senesi iyün 1-ne qadar Qırım mevzuatı ile bağlı maqalelerini taqdim etmeli.
Professional tehnikiy donatuvnıñ berilmesi boyunca arizalar jurnalist, bloger ve muarririyetler içün elektron şekilde qabul etile.
Arizalardan ğayrı, er muarririyet ya da jurnalist Qırım mevzuatı ile yahşı tanış olğan eki şahıstan tevsiye mektüplerini alıp, aid4crimea@gmail.com adresine yollamaq kerek.
Arizalar 2015 senesi iyül 18, avgust 20, sentâbr 20-ne qadar qabul etile.
