Link açıqlığı

Qırımda ukrain edebiyatınıñ yetişmemezligine şikâyet eteler ve qıtadan kitaplarnı yollamaq ricada bulunalar


Qırımda Ukrain medeniy merkeziniñ teşkilâtçıları yarımadanıñ işğаlinden soñ ukrain edebiyatınıñ yetişmemezligini qayd eteler, bu sebepten talebelerniñ VNO azırlığı ile problemleri peyda ola. Faaller qıtaiy Ukraina sakinlerini Qırımda ilk ukrain cemaat kitaphanesiniñ teşkil etilmesi içün kitap toplanılmasına qoşulmağa çağıralar.

Qırımda Ukrain medeniy merkeziniñ teşkilâtçılarından biri Leonid Kuzmin aytqanı kibi, şimdi luğatlar, malümat kitaplarınıñ, entsiklopediya, tehnikiy ve ilmiy edebiyatnıñ, ukrain klassik ve zemaneviy yazıcılarınıñ kitaplarınıñ qıtlığı duyula.

«Soñ 23 yıl devamında Qırım kitaphaneleriniñ fondları ukrain tilli kitaplarnen toldurılmay edi. Neticede bütün olğan edebiyat eskirdi, kitaphane fondlarında ise esasen rus tilinde yazılğan edebiyat bar», – yaza Kuzmin Facebookta.

«Ayrı mesele – kitaphanelerde ukrain tilinde yazılğan bala kitaplarınıñ olmasıdır. Mektep derslikleri ile de aynı vaziyet. Qırımnıñ Rusiye Federatsiyasına qoşulmasından ve Qırım mektepleriniñ Rusiye tasil standartlarına keçüvinden soñ mektepler eski kitaplarnı teslim etmek mecbur oldı. Yani talebeler ukrain programması boyunca tasil almaq imkâniyetinden marum qaldı», – dey o.

Bu sebepten Ukrain medeniy merkezi yuqarıda añlığan kitaphaneniñ teşkil etilmesi içün kitaplarnıñ toplanılmasını ilân etti. Merkezniñ teşkilâtçıları aktsiyağa tek Ukraina vatandaşlarını degil de, vilâyet tasil idarelerini, qıtaiy Ukraina kitaphanelerini de qouşlmağa çağıra.

XS
SM
MD
LG