Ukrainada silâlı ziddiyet qurbanı – 6500 insan oldı, 16 biñ – yaralandı. Böyle malümatnı içtimaiy ğayret idaresi boyunca BMT ofisi taqdim ete.
Halqara teşkilâtnıñ malümatına köre, beş million insanğa içtimaiy yardım kerek.
«Akimiyetniñ nezaretinde olmağan territoriyalarğa irişim pek qıyın meseledir, bu sebepten gumanitar yardımnıñ ketirilmesi de zor ola», – denile ofisniñ beyanatında.
«Qayd etilgen 1,3 million mecburen köçip kelgen insan bar olğanından Ukraina dünyada doquzıncı yerni ala», – deyler mütehassıslar.
Meselelerden biri – ziddiyet zonasında suv teminlevidir.
Ukraina şarqında silâlı ziddiyet bir yıldan ziyade devam ete – 2014 senesi aprel ayından. Ukraina akimiyeti şimdi Donetsk ve Lugansk vilâyetleriniñ qısımlarını nezaret etip olamay.
