Link açıqlığı

Poroşenko Avropa Sentsovnıñ, qırımtatarlarnıñ taqdiri ve Qırım işğali aqqında unutmaycağına inana


Rusiye FSB tarafından Qırımda yaqalanğan rejissör Оleg Sentsov Ukraina mustaqilligi oğrunda küreşe ve aynı zamanda bütün Avropanıñ barışıq ve havfsızlığını qoruy. Bu aqta Ukraina prezidenti Petro Poroşenko Berlinde Ukrain kino künleriniñ iştirakçileri ögünde çıqışta bulunıp ayttı.

Poroşenko teşkilâtçılarğa minnetdarlığını bildirdi ve «insan aqlarına büyük avropalı ürmet adetini» qayd etti.

«İnanam, Avropa kinorejissör Оleg Sentsovnıñ, qırımtatar halqınıñ taqdiri ve Ekinci cian cenki vaqtından berli mustaqil devletniñ territoriyasına ilk arbiy istilâ aqqında unutmaz», – dey o.

Oleg Sentsov 2014 senesi mayıs ayında Rusiye FSB hadimleri tarafından Qırımda yaqalanğan edi. Onı Aqmescit, Yalta ve Aqyarda teraktlarnıñ azırlanmasında qabaatlaylar. Sentsovnıñ adliyecisi SİZOda onı çekiştirgenlerini bildirgen edi. Rejissör qabaatını red ete. Bundan ğayrı, bu iş boyunca daa üç kişi yaqalandı.

Aprel 16-da taqiqat ukrain rejissörini «silânı qanunsız tutuvda» da qabaatladı.

Moskvanıñ Lefortovo mahkemesi ukrain rejissöri Oleg Sentsovnıñ apis müddetini mayıs 11-ge qadar arttırdı.

XS
SM
MD
LG