Link açıqlığı

Qırımtatar bayrağı Qırım işğaline qarşı küreş timsali oldı. Bu aqta Ukraina prezidentiniñ qırımtatarlarnıñ işlerinden vekâletlisi Mustafa Cemilev Kiyevde Qırımtatar Bayrağı Kününde çıqışta bulunıp ayttı, – haber ete Qırım.Aqiqat mühbiri.

«Şimdi bu bayraq toprağımızda işğalci rejimge qarşılıq timsali oldı, tek qırımtatarlar içün degil, Qırım işğalcilerden bir kün azat etilecegine, demokratik Ukraina terkibinde Qırım muhtar cumhuriyeti olacağına inanğan er kes içün timsali oldı», – dey Cemilev.

O şunı hatırlattı ki, 98 yıl evelsi altın tamğa ile kök tüslü keten Qırımtatarlarnıñ birinci Qurltayında qırımtatarlarnıñ milliy bayrağı olaraq ilân etilgen edi. Qırımtatar Bayrağı Kününde Qırımtatar Milliy Meclisiniñ reisi Refat Çubarov da çıqışta bulundı.

Mustafa Cemilev işğalden azat etilgen Qırımda Ukraina terkibinde qırımtatar muhtariyeti ilân etilecegine, qırımtatarlarnıñ bayrağı ise Qırımda Ukraina bayrağı ile resmiy timsal olacağına ümütini bildirdi. Kiyevniñ Şevçenko bağçasında keçirilgen tedbirde bir 200 insan iştirak etti.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

XS
SM
MD
LG