10,5*7,5 metr büyükliginde qırımtatar bayrağını iyün 26 künü Herson şeeriniñ Azatlıq meydanında Qırımtatar Bayrağı Kününe bağışlanğan tedbirlerniñ çerçivesinde açqanlar.
Qırım.Aqiqat bildirgeni kibi, mitingde yalıñız Hersonda yaşağan qırımtatarları degil de, vatanperver siyasiy ve cemaat teşkilâtlarınıñ falleri, vilâyet ve şeer akimiyetiniñ faalleri iştirak etti.
Aktsiya teşkilâtçılarından biri, «Küreş» qırımtatar medeniy-sport merkeziniñ yolbaşçısı İbragim Suleymanovnıñ aytqanı kibi, Hersonda açılğan qırımtatar bayrağı – qıtaiy Ukrainada olğan eñ büyük bayraqtır. Bu bayraq tek 2011 senesi qırımtatarlarğa türk iş adamları tarafından bağışlanğan bayraqtan ufaqtır – onıñ büyükligi – 22 metrni teşkil ete.
«Serbestlik ve alicenaplıq timsali olğan kök tüste altın tamğalı bayraq 1917 senesi birinci Qırımtatar Milliy Qurultayında qabul etildi. Qaraştırılğanda, mavı ve sarı tüsleri yeşil ola – ayat renki. Bu tüslerniñ ukrain bayrağında olması da pek timsaliydir. Demek, ecdatlarımıznıñ azatlıq ve alicenaplıq aqqında aynı tasavurı bar edi. Şimdi bayrağımız – qırımtatar halqınıñ aq-uquqları oğrunda küreş timsalidir», – dey İbragim Suleymanov.
Herson vilâyet memuriyetiniñ içki siyaset faaliyeniñ idare başı Pavel Gavriş çıqışta bulunıp, tek ukrain ve qırımtatar bayraqları degil, timsaller de yaqın olğanını qayd etti.
«Trezubets ve tamğanıñ oşağanı tesadüfiy degildir. Biz – qardaş halqmız. Qırımtatarlar em 2004, em 2014 seneleri Maydan faalleri sırasına nafile kirmegenler».
Tedbirniñ sayğılı musafiri – Qırımnıñ milliy küreş federatsiyasınıñ prezidenti Enver Güseynov oldı.
Qıtaiy Ukrainada olğan eñ büyük qırımtatar bayrağını Herson sakini Alime Kurtvapova, Herson milliy tehnikiy universitetiniñ studenti tikti.
«Öz halqım içün bir şey yapmağa istep, bu bayraqnı tiktim», – dey o.
Miting iştirakçileri «Qırım – Ukraina!» şiarını qırımtatar ve ukrain tilinde seslendire, Ukraina ve qırımtatar gimnlerini icra ettiler.
Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.
