Kiyevde iyün 26 künü Mila Çizeldaynnıñ sergisi açıldı. Qırım ressamı Faces of Crimea leyhasını taqdim etti. 150*190 sm beş ketende ressam qırımtatar halqı içün müim tarihiy ve zemaneviy erbaplarınıñ sımalarını Qırım şeerleriniñ manzalarından tasvir etti, – haber ete Qırım.Aqiqat mühbiri.
Portretler arasında – Qırım hanı II Ğazı Geray ve Bağçasaray şeeri, siyasiy erbap İsmail Gasprinskiy ve Salançik, zemaneviy yırcı Elvira Sarıhalil ve Bağçasaray, cemaat erbabı Tamila Taşeva ve Kezlev, qırımtatar halqınıñ yetekçisi Mustafa Cemilev ve Sudaq.
Yaş ressamğa kelip qol tutqan Cemilev aytqanı kibi, sanatnıñ bu şeklini o pek te añlamay, amma müellif işleriniñ unikal olğanını ve kerçekten de «canğa tiygenini» qayd etti.
Cemaat erbabı, «KrımSOS» teşebbüsiniñ koordinatorı Tamila Taşeva öz portretini körmege beklemedi, bunı tek sergide ögrengenini bildirdi.
«Begendim – abideviy ve güzel bir iş. Mila pek sezgir insan, ve bu resimlerni yazğanda, bu ise pek büyük bir iş, insanlarnıñ duyğularını yaşay edi. Men oña, aqiqaten, minnetdarım ve qırımtatarlarda daa iç bir vaqıt olmağan böyle unikal leyhanıñ iştirakçilerinden biri olmağa pek memnünim», – dey Taşeva.
Mila Çizeldayn dey ki, resimlerni şimdi Qırım ve qıtaiy Ukraina arasında olğan sıñırdan keçirmege qıyın mesele edi.
«Resimlerniñ bir qısmını 2014 senesinde 2015 senesi iyünge qadar Qırımda yazğan edim. Olarnı sıñırdan qataqlap ketirdim, dörtüncisni endi mında yazıp bitirdim», – dey ressam.
Portretlerden ğayrı zalda «Qırım göñlü» adlı installâtsiya taqdim etilgen – Sudaq rayonı Novıy svetten ketirilgen quma, Quru Özen taşları, Küçük Özen toprağı, qaya taşları, Küçük Özen camisiniñ tamirinde tapılğan qadimiy Quran parçaçıqları.
Sergi açılışında Elvira Sarıhalilniñ icrasında qırımtatar yırları yanğıray edi.
Resimlerni Kiyevde «M17 » zemaneviy sanaat merkezinde körmek mümkün.
