Kiyevde Ukraina tarihınıñ milliy müzeyinde qırımtatar bayrağına ve Qırım hanlarınıñ sülâle tamğasına bağışlanğan sergi açıldı. Sergi ziyaretçileri «taraq tamğa» timsaliniñ halef qulanuvını taqdim etken eksponatlar ile tanış ola bileler», – haber ete Qırım.Aqiqat mühbiri.
«Qırımtatar bayrağı» foto sergisinde Qırım, Lviv, Kiyev, Amerika ve diger memleket fotograflar iştirak etti. Er bir fotoresimde bayraq tasvirlengen – Ukrainada ve onıñ tışında.
Bunıñ ile müzeyde qırımtatarlarnıñ sürgünligine bağışlanğan sergi çalışmaqta.
Qırım meseleleri boyunca Ukraina Devlet hızmetiniñ reisi Aslan Ömer Qırımlı Qırım.Aqiqatqa aytqanı kibi, qataiy Ukrainada böyle tedbirlerniñ keçirilmesi ümüt bere ve işğal etilgen topraqta qalğan vatandaşlarğa destek köstere.
«Bu adise bizler içün pek müim, çünki qırımtatar medeniyetiniñ yañıdan doğuvı, cemiyetniñ qırımtatar halqınıñ timsalleri, tarihı ve faciaları ile tanışuvı pek müimdir. Añlav içün pek emiyetlidir», – dedi o.
Belli qırımtatar ustası ve El-Cheber ustahanesiniñ tesisçisi Rustem Skibin Qırım.Aqiqatqa aytqanı kibi, bayraq aqqında foto sergisini teşkil etmek ğayesi çoqtan peyda olğan edi, şimdi ise buña eñ kelişken zamandır.
Rustem Skibin dey ki, ileride «Qırımtatar bayrağı» sergisi Ukraina prezidentiniñ memuriyetinde taqdim etilecektir.
Evel bildirilgeni kibi, iyün 3 künü Kiyevde flash mob başlandı, maqsadı – qırımtatar bayrağını Ukraina şeerlerinden keçirip, birdemlik timsali olaraq qırımlılarğa teslim etmek.
Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.
