Link açıqlığı

Kiyevde yaşağan bir eki yüz qırımtatarı Kiyevniñ Şevçenko bağçasında Qırımtatar milliy bayraq kününi qayd ettiler. Toplanğanlar ögünde Qırımtatar Milliy Meclisiniñ reisi Refat Çubarov ve Ukraina prezidentiniñ qırımtatarlarnıñ işlerinden vekâletlisi Mustafa Cemilev, Qırım ve Aqyar meseleleri boyunca Ukraina delvet hızmetiniñ başı Aslan Ömer Qırımlı çıqışta bulundılar, – haber ete Qırım.Aqiqat mühbiri.

Öz çıqışlarında olar qırımtatar halqınıñ aq-uquqları oğrunda küreşinde qırımtatar bayrağınıñ emiyetini qayd ettiler.

Bayram teşkilâtçısı – «Kiyevde qırımtatar cemiyeti» cemaat teşkilâtı oldı. Teşkilâtçılarından biri Alim Mambetov aytqanı kibi, tedbirniñ esas maqsadı – «Kiyev sakinlerine qırımtatarlarnıñ öz milliy timsalleri ve böyle bayram bar olğanını köstermektir».

«Maqsatlardan daa biri – qırımtatarlarnı toplamaq, bir-biri ile tanıştırmaq, vatandan uzaq coyulmasınlar dep», – ayta Mambetov.

O şunı da qayd etti ki, bugün Kiyevde aman-aman eki biñ qırımtatarı yaşay. Ava şaraitlerinden sebep kontsert programması tam şekilde amelge keçirilmegeninden yazıqsınuvını bildirdi.

Musafirler içün milliy oyuncı ve yırcılar çıqışta bulundı, Ukraina ve qırımtatarlarnıñ milliу gimni yanğıradı. Toplanğanlar imam, UMMA Ukraina musulmanları Diniy İdaresiniñ temsilcisi ile dua oqudılar.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

XS
SM
MD
LG