Rusiye Federatsiyası Federal meclisiniñ Federatsiya şurası qırımlılarnı vesiqalarnı deñiştirgende ödegen gümrük bergilerini lâğu etken qanunğa qoltuttı. Bunı cuma künü, iyün 26-da, Qırım ükümetiniñ matbuat hızmeti bildirdi.
Berilgen malümatqa köre, qanun Rusiye Bergi kodeksiniñ «Qırım Cumhuriyeti ve Aqyar federal şeerinde uquq ceetinden müim olğan areketlerni yapmaq içün devlet organlarına muracaat etken şahıslarnı» devlet gümrük bergisini ödemekten boşatmaq maddesinde qayd etildi.
«Qırım Cumhuriyetini Rusiye Federatsiyasına qabul etüv qanunına köre Rusiye Federatsiyasınıñ vatandaşları olaraq tanılğan ve Qırım ve Aqyarda Federal migratsion hızmeti, İçki işler nazirligi ve Rostehnadzor territorial organlarına uquq ceetinden müim olğan areketlerni yapmaq içün, çetel pasportı, aydavcı şeadetnamesi, qayd vesiqaları ve bir sıra diger vesiqanıñ berilmesi ile bağlı muracaat etken şahıslar devlet gümrük bergisini ödemeycekler», – dep aytıla beyanatta.
Bu vatandaşlar mal-mülk aqqını qayd etkende de devlet gümrük bergisini tölemeycekler.
Qanun resmiy şekilde derc etilgen soñ işke tüşürile.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
