Link açıqlığı

Saatnıñ esas haberi

Qırım Devlet şurasında ATR ve Qırım.Aqiqatnıñ faaliyetini sıñırlağan mektüp aqqında eşitmediler


Qırım Devlet şurasınıñ haber siyaseti, bağ ve kütleviy kommunikatsiya komitetiniñ reisi Sergey Şuvaynikov Qırımnıñ içki siyaseti ve haber Nazirliginiñ ATR, Qırım.Aqiqat ve diger uyğun olmağan matbuat vastalarınıñ non grata olğanı aqta mektüp bar olğanı aqqında bir şey eşitmegenini bildire.

Bunı o Qırım.Aqiqatqa bildirdi.

«Bu mektüpni körmedim ve bilmeyim. Şunıñ içün bu mevzuda bir şey aytamam. Öyle mektüp olsa, onı oqumağa ve bilmege çarem olur edi», – dey Şuvaynikov.

O şunı da qayd etti ki, eger de jurnalistler Qırımda devlet şirketleri territoriyalarında işlemege istese, olar Rusiye Federatsiyasınıñ qanunlarına riayet etmek kerektirler. Aytqanı kibi, Rusiyede qayd etilgen matbuat vastalarınıñ mühbirleri yarımadada serbest sürette malümatnı toplay ve tarqata bile, ukrain jurnalistleri ise Rusiye Tış işler Nazirliginde akkreditatsiyanı elde etmek kerektir.

Şuvaynikov bu mektüp boyunca Qırım Haber nazirliginiñ başı Dmitriy Polonskiyge muracaat etmege tevsiye etti. Qırım.Aqiqat ondan daa izaat alıp olamay.

ATR telekanalınıñ baş müdir muavini Lilâ Bucurova iyün 25 künü Facebook saifesinde bildirgeni kibi, Qırım akimiyeti non grata olğan matbuat vastalarınıñ cedvelini tizdi: bu neşirlerniñ jurnalistlerine yarımadada keçirilgen kütleviy tedbirlerde işlemege imkân bermezler. Qırımda «yasaqlanğan» matbuat vastalarınıñ sırasına Qırım.Aqiqat saytı, ATR qırımtatar telekanalı, QHA haber agentligi ve «15 minut» kirdi.

XS
SM
MD
LG