Link açıqlığı

Kliçko, Qırımtatar Milliy Bayraq Künü ile hayırlap, Qırımnıñ qaytaruv planını ilân etti


Kiyev şeer başı Vitaliy Kliçko iyün 26 künü qırımtatar halqını Milliy bayraq Künü ile hayırladı. Bu maqsat ile Kliçko Obolon yalı kenarına keldi. Mında faaller Ukrainada eñ büyük qırımtatar bayrağınıñ resmini yapmaq içün toplandı, haber ete Qırım.Aqiqat.

«Qırımtatarlarnı bayram ile hayırlamağa isteyim. Vatanını terk etmege mecbur olğan vaqıtta olarğa qol tutmaq pek müim. Esas vazifemiz – qırımtatarlar mında, Kiyevde, özlerini evde olğanı kibi duymaq kerekler, Qırımnı Ukraina terkibine qaytarmalımız. Çaresini de bilem: islâat neticeleri kösterilgende, Ukrainada ayat standartları Avropa standartlarına uyğun kelgende», – dedi Vitaliy Kliçko.

Kiyev şeer başınıñ fikrine köre, ukrain bayrağı yanında resimi yapılacaq qırımtatar bayrağı «şeer müitine pek kelişir».

«Mında betondan ğayrı bir şey yoq. Bilesiñizmi, modern-art bar, graffiti yapqan insanlar bar. Menimce, iç bir oñaytsızlıq olmaz, timsalcilik ise büyüktir», – dey Kliçko.

Vitaliy Kliçko Obolon yalısında, Kiyev iyün 26 künü
Vitaliy Kliçko Obolon yalısında, Kiyev iyün 26 künü

Fallerniñ aytqanı kibi, bayraqnıñ resim yapuvı sekiz saatten bir qaç künge uzana bile, ava şaraitlerine köre.

Cuma künü, iyün 26-da, Kiyevde Qırımtatar Bayrağı Kününde bir sıra tedbirniñ keçirilmesi planlaştırıla, olarnıñ çerçivesinde Obolon yalısında büyük qırımtatar bayrağınıñ resmini yapacaqlar. Tedbirlerniñ esas qısmı ise Kiyevde saat 19:00 Şevçenko bağçasında başlanacaq, mında Ukrainada eñ büyük qırımtatar bayrağını açacaq olalar. Meclis yolbaşçılığınıñ çıqışı, yarış ve avto yürüşi planlaştırıla.

İyün 26 künü açılacaq eñ büyük qırımtatar bayrağı aqqında Herson viyaletiniñ faalleri de bildireler.

Evel bildirilgeni kibi, iyün 3 künü Kiyevde flash mob başlandı, maqsadı – qırımtatar bayrağını Ukraina şeerlerinden keçirip, birdemlik timsali olaraq qırımlılarğa teslim etmek.

Qırım Qırımtatar Milliy Meclisi reisiniñ muavini İlmi Ümerov Qırımnıñ rusiyeli prokuraturasından Qırımtatar Bayrağı Kününe qanunsız tedbirlerniñ keçirilmesi mümkün olmağanı aqta tenbiyeni elde etti. Bundan evel böyle tenbiyeni Aqmescitte Ukrain medeniy merkeziniñ teşkilâtçılarından biri Leondi Küzmin elde etti.

Aqmescit akimiyeti iyün 26 künü qayd etilgen Qırımtatar milliy bayraq Kününe tedbir ve avto yürüşleriniñ teşkilâtçılarına bayramnı keçirmege üç kere yasaq etti. Bu sebepten qırımtatarlarnı evler ve maşinalarını milliy bayraqlarnen yaraştırmağa çağıralar.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

XS
SM
MD
LG