Link açıqlığı

Qırımda matem mitinginde iştirak etken imamğa para cezasını berdiler – Meclis


Cumaaqşamı künü, iyün 25-le, Krasnoperekopsk rayonı Küçük Mamçıq köyüniñ imamı Yunus Nemetullayevge rayon mahkemesi qırımtatarlarnıñ sürgünligi 71 yıllığına bağışlanğan matem mitinginde iştiraki içün 10 biñ ruble para cezasını berdi

Bu aqta Qırımtatar Milliy Meclisiniñ matbuat hızmeti bildire.

«Krasnoperekopsk rayon mahkemesiniñ Yunus Nemetullayevniñ memuriy bozuluvı aqta qararını seslendirdiler. Qararğa binayen oña 2015 senesi mayıs 18 künü mitingde iştirak etkeni sebebinden 10 biñ ruble miqdarında para cezasını berdiler», – dep bildirde matbuat hızmeti Qırımtatar Milliy Qurultayınıñ merkeziy saylav komissiyasınıñ reisi Zair Smedlâyevniñ sözlerini.

Bu iş boyunca ilk mahkeme toplaşuvı 2015 senesi iyün 18 künü keçti, o vaqıt mahkeme «işniñ şaraitlerini tafsilâtlıca ögrenmek içün» teneffüsni ilân etken edi.

Qırım uquq qoruyıcıları adet üzre bu malümatnı izaatlamay.

Er yıl Qırımda Sürgünlik künü yıllığı munasebeti ile kütleviy tedbirler keçirile edi, şu cümleden Qırım paytahtınıñ merkezinde matem mitingi. Amma 2014 senesi mart ayında Rusiye tarafından Qırım işğal etilgeninden soñ bu kibi aktsiyalarnıñ keçirilmesi yasaq oldı. 2015 senes Qırımtatar Milliy Meclisi kene yerli akimiyetten red cevabını aldı.

XS
SM
MD
LG