Qırım akimiyeti non grata olğan matbuat vastalarınıñ cedvelini tizdi: bu neşirlerniñ jurnalistlerine yarımadada keçirilgen kütleviy tedbirlerde işlemege imkân bermezler. Qırımda «yasaqlanğan» matbuat vastalarınıñ sırasına Qırım.Aqiqat saytı, ATR qırımtatar telekanalı, QHA haber agentligi ve «15 minut» kirdi.
Bu aqta ATR telekanalınıñ baş müdir muavini Lilâ Bucurova iyün 25 künü Facebook saifesinde bildirdi. Bucurovanıñ aytqanı kibi, bu kibi avale Qırımnıñ İçki siyaset ve haber nazirliginiñ mektübinde yazılğan.
«Qırımda qanuniy sürette çalışqan ATR telekanalınıñ hadimleri, «Kvinmedia» tarafından berilgen Roskomnadzornıñ şeadetnamesini taqdim etip, tek resmiy organlar içün degil de, «özleri» içün de non grata oldılar. Soñ eki künde qırımtatar medeniyet müessiseleri bizni çıqaruv imkânsızlığı aqta tenbiyeleyler. Bunıñ ile Qırımnıñ içki siyaset ve haber Nazirliginiñ mektübine esaslanalar. Mında ATR, «15 minut», Qırım.Aqiqat ve QHA jurnalistlerini yollamamaq tevsiye etile. Vatanımızda nefes almağa mümkünmi? Öyle devam etse, bizge hastahanelerde tibbiy yardım köstermeycekler, tükânlarda aş satmaycaqlar, naqliyatqa oturtmaycaqlar, urbamızda Sarı yıldıznı taşımağa mecbur eterler, ellerimizde ise lager nomerası ile tatu eterler», – dey Lilâ Bucurova.
Qırım.Aqiqat muarririyeti Qırımnıñ içki siyaset ve haber nazirliginden bu aqta malümatnı elde etmege tırışa.
2015 senesi aprel ayında Freedom House teşkilâtı Rusiye tarafından işğal etilgen Qırım söz serbestliginiñ seviyesi eñ alçaq olğаn memleket ve territoriyalar sırasına kirgeni aqta bildirdi. Yarımada bu cedvelde Aqrusiye, İran, Turkmenistan, Özbekistan ile birliktedir.
