Link açıqlığı

Aqşam, iyün 25-de, Kiyevde Ukraina tarihınıñ milliy müzeyinde iyün 26 künü qayd etilgen Qırımtatar Bayrağı Kününe bağışlanğan sergi açılacaq.

Bu aqta Ukraina prezidentiniñ qırımtatarlarnıñ işlerinden vekâletlisiniñ matbuat hızmeti bildire.

Tedbirniñ anonsında aytılğanı kibi, «Qırımtatar bayrağı» sergisini Ukraina tarihınıñ milliy müzeyi, «Tamğa» medeniyet ve üner merkezi ve «El-Cheber» cemaat teşkilâtı azırladı.

Sergide Ukraina tarihınıñ milliy müzeyi toplamından unikal eksponatlarını taqdim etecekler.

Bundan da ğayrı, «Qırımtatar bayrağı» foto sergisi taqdim etilecek. Onıñ azırlığında Qırım, Lviv, Kiyev ve Amerikadan 9 fotograf iştirak etti.

Tedbir Qırımtatar Milliy Meclisiniñ yardımı ile azırlanıldı. Tantanalı açılışı cumaaqşamı künü saat 19:00 olmalı.

Cuma künü Ukrainada Qırımtatar bayrağı Kününe bağışlanğan tedbirler keçirilecek. Kiyevde tedbir iştirakçileri, Ukrainada eñ büyük qırımtatar bayrağını açıp, birlik timsaline toquna bilecekler.

Evel bildirilgeni kibi, iyün 3 künü Kiyevde fleş mob başlandı, maqsadı – qırımtatar bayrağını Ukraina şeerlerinden keçirip, destek timsali olaraq onı qırımlılarğa bermek. Kiyevde Qırımtatar milliy bayraq Kününi marş, avto yürüşi, sergi ile qayd etecekler. «Eki bayraq – bir memleket» kampaniyası Ukrainada bu afta başlandı.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

XS
SM
MD
LG