Qırımtatar Milliy Meclisi reisiniñ muavini İlmi Ümerov dey ki, muayyen siyasiy añlaşmalar «fevral 26» işi boyunca yaqalanğan ve SİZOda bulunğan Meclis reisiniñ daa bir muavini Ahtem Çiygoznıñ mahkeme ketişatını lâğu ete bile.
Bu aqta Ümerov Qırım.Aqiqatqa bildirdi.
«Çiygozğa qarşı işniñ siyasiy negizi bar olğanını qayd etmek ister edim, onıñ içün muayyen siyasiy añlaşma qabul etilse, mahkemeniñ keçirilmemesi mümkün olur. Amma şimdilik kimse bir şey teklif etmey, bu aqta muzakere de keçirilmey», – dedi Meclis reisniñ muavini.
Onıñ fikrine köre, advokatnıñ qayd etken şaatlarını Taqiqat komitetinde sorğuğa çekmege başlağanları endi taqiqatnıñ soñ basamağı kelgenini bildire.
Ümerov Çiygoznı soñki sefer bir ay evelsi mahkeme toplaşuvında körgenini ayta, şunıñ içün sağlığı aqta bir şey aytıp olamay.
Evel Qırımtatar Milliy Meclisiniñ reis muavini İlmi Ümerov Qırımda «fevral 26» işi boyunca yañı sorğular aqta bildirgen edi.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
