Link açıqlığı

Halq deputatı, qırımtatar halqınıñ yetekçisi Mustafa Cemilev Romada cemaat faalleri ile körüşüvde İtalyan ükümeti ve Avropa birligi diger memleketleriniñ yolbaşçıları cezalar vastası ile Rusiyeni öz istilâiy yolundan vazgeçmege mecbur ete bilecegine işançını bildirdi.

«Rusiyege qarşı sanktsiyalarnıñ faydası bar. Öyle de olsa, Rusiye özü halqara sanadaki yaramazlığından vazgeçmege mecbur olur. Ebet, bu sanktsiyalarğa bütün memleketlerniñ qoşulması müim», – dep bildire Mustafa Cemilevniñ sözlerini Radio Svoboda.

O şunı da qayd etti ki, Ukraina yarımadanıñ iqtisadiy qamaçavını devam etmek kerek. Onıñ fikrine köre, «işğalcilerni öz esabına aşatmağa aqılsızdır», çünki Qırımnıñ teminlevi aqta endi Rusiye tüşünmeli.

Qırımtatar halqınıñ yetekçisi Kiyevniñ böyle areketleri Moskvanıñ daa da ciddiy istilâsınıñ peyda olmasına yol berecegi aqta fikirge qoşulmay.

«Menimce, Rusiye ne qadar çoq areket etse, o qadar da tez öz soñuna yeter. Eminim, Ukraina – Rusiyeniñ soñki macerasıdır. Çeçnâ degil. Mında Rusiye boğulır. Şimdi ukrain arbiyleriniñ telefi 5-6 biñ elâk olğannı teşkil etse, Rusiyelilerde eki buçuq qat çoq. Biz arbiylerimizni şan-şerefler ile kömsek, olar ise köpeklerni kömgeni kibi», – dey Cemilev.

Qırımtatarlarnıñ milliy yetekçisi, Ukraina prezidentiniñ qırımtatar halqınıñ işlerinden vekâletlisi Mustafa Cemilev iyün 23 künü Romağa kelip, İnsan aqları boyunca Parlament komitetiniñ ve Deputatlar palatasında Tış işler boyunca komitetiniñ toplaşuvına qoşuldı.

XS
SM
MD
LG