Ukrain faali, Aqmescitte Ukrain medeniy merkeziniñ teşkilâtçılarından biri Leonid Kuzmin Qırımnıñ rusiyeli prokuraturasından Ukraina Anayasası Kününde aktsiyalarnıñ keçirilmesi mümkün olmağanı aqta tenbiyeni elde etti. Bunı Kuzmin Qırım.Aqiqat mühbirine bildirdi.
Vesiqada aytılğanı kibi, «Aqmescit şeeriniñ prokuraturasında olğan malümatqa köre», Qırımda Qırımtatar Bayrağı Kününe ve Ukraina Anayasası Kününe bağışlanğan narazılıq numayışları azırlanıla eken.
«Radikal keyfleri olğan qırımtatar ve ukrain faalleri meskün yerlerde ukrain timsallerini qullanıp ve «Ukrainağa şan-şerefler – Qaramanlarğa şan-şerefler olsun» şiarlarını seslendirip, Qırımnıñ uquq qoruyıcı organlarını küç qullanmağa mecbur etmege planlaştıralar», – denile vesiqada.
Şeer prokurorınıñ muavini, adliye keñeşçisi Zobkov Leonid Kuzminge bildirdi ki, akimiyet ile uyğunlaştırılmağan tedbirlerniñ keçirilmesi qanunsızdır.
«Mart 9-da böyle bayraq açılğan edi, ve böyle sözler menim tarafımdan teşkil etilgen tedbirde aytılğan edi», – dey Leonid Kuzmin.
«Hadimler kene de bizim planlarımız aqqında haberdar olğanına ima ettiler, çünki iyün 28-ne olğan planlarımız aqqında daa bildirmegen edik. Biz nasıl şaraitlerde ve nezaret altında olğanımıznı bilemiz ve işimizni toqtatmağa niyet etmeymiz», – dedi faali.
Faaller mart 9 künü Aqmescitte ukrain şairi Taras Şevçenko hatırasına bağışlanğan aktsiyada yaqalanıldı. Mart 12 künü olarnı aktsiyada ukrain timsalleriniñ olmasından sebep maküm ettiler.
