Yarımadanıñ eñ büyük taşıyıcısı olğan «Krımavtotrans» şirketinde deyler ki, yarımada tışına ve Aqyarğa yürmegen avtobuslarğa biletlerni pasportsız satın almaq mümkün eken.
Bunı Qırım.Aqiqatqa şirketniñ matbuat hızmetinde bildirdiler.
«Bütün subyektlerara seferlerge şahısnı tasdiqalağan vesiqalarnıñ olması şart: pasport, doğuv aqqında şeadetname, arbiy bilet. Subyektlerara seferler – Qırım tışına ve federal emiyeti olğan Aqyar şeerine çıqqan seferlerdir», – dep añlata «Krımavtotrans» müdiri Andrey Avtayev.
Mında şunı da qayd ettiler ki, Qırım tışına ve Aqyarğa çıqmaq içün işbu vesiqalarnıñ olmasını Rusiyeniñ №16 «Naliyat havfsızlığı aqqında» federal qanunı talap ete.
Evel bildirilgeni kibi, qırımlılar vokzallarda nevbetler olmasına şikâyet eteler. Buña sebeplerden biri – biletlerniñ pasportlar boyunca satılmasıdır.
