Salı künü politsiya tarafından Erivanda elektroenergiya fiyatlarınıñ paalılaşuvına qarşı narazılıq aktsiyalarınıñ dağıtılmasına baqmadan, çarşenbe künü numayışlar devam ete.
Yüzlerce faali çöplük tenekelerinden barrikadalarnı etip, bu gece Bagramân meydanında qaldı, amma narazıcılar içün prezident sarayına irişim daa salı aqşamından qapatıldı.
Deyler ki, Ermenistan siyasiy firqalarından bir qaç vekil de bu gece narazıcılar ile bulunıp, politsiya ve faaller arasında «canlı» qalqannı teşkil etti.
Erivan politsiyasınıñ yolbaşçısı muavini Valeriy Оsipân mitingni «qanunsız» olaraq adladı ve yaqalanğan faallerniñ azat etilgenini bildirdi.
Salı künü saba Erivan politsiyası suv topu vastası ile bazarertesi künü «Çaypavğa yoq!» areketi tarafından Ermenistanda avgustnıñ birinden elektroenergiya fiyatlarınıñ paalılaşuvına qarşı azırlanılğan mitingni dağıttı. Neticede bir 200 insannı yaqaladılar, çoqusı çatışmalar neticesinde yaralandı. Politsiya tarafından zarar körgenler arasında jurnalistler de bar edi, şu cümleden Radіo Svoboda mühbirleri. Radio Svobodnaya Yevropa – Radіo Svoboda yolbaşçılığı Ermenistanda jurnalistlerge nisbeten kösterilgen basqığa qarşılıqnı bildirdi. Politsiya yolbaşçısı afu soradı ve jurnalistlerge zararnı tazmin etmege söz berdi.
