Link açıqlığı

Hersonda Qırım Ukraina olğanını hatırlatmaq içün muazzam qırımtatar bayrağını açacaqlar


Hersonda iyün 26 künü Qırımtatar Bayrağı Kününe bağışlanğan miting keçecek. Tedbir teşkilâtçısı – «Küreş» qırımtatar medeniy-sport merkezi. Qırım.Aqiqatqa bildirilgeni kibi, miting devamında «qıtada mahsus şu tedbir içün tikilgen muazzam qırımtatar bayrağını» açacaqlar.

Bunıñ ile cemaat teşkilâtlarınıñ temsilcileri ve faallerniñ çıqışları planlaştırılğan. «Küreş»te Ukraina bayraqları ile şeerniñ vatanperverlik küçlerini de qoşulmağa çağıralar.

Teşkilâtçılar deyler ki, tedbirniñ maqsadı – «halq birliginiñ timsali ve Rusiye işğalcilerine Qırım er vaqıt Ukraina olğanı ve olacağı aqta hatırlatacaq» Qırımtatar Bayrağı Kününiñ qayd etilmesidir.

Bunıñ ile medeniy-sport merkeziniñ temsilcileri vatandaşlarnı şu künü milliy bayraqlarnı kötermege çağırdılar.

Evel bildirilgeni kibi, iyün 3 künü Kiyevde fleş mob başlandı, maqsadı – qırımtatar bayrağını Ukraina şeerlerinden keçirip, destek timsali olaraq onı qırımlılarğa bermek.

Kiyevde Qırımtatar milliy bayraq Kününi marş, avto yürüşi, sergi ile qayd etecekler.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

Ukrainada iyün 26 Qırımtatar bayrağı kününe bağışlanğan «Eki bayraq – bir memleket» kampaniyası «Qırım – Ukrainadır» kampaniyasınıñ devamıdır.

XS
SM
MD
LG