Link açıqlığı

İyün 26 künü qayd etilgen Qırımtatar Milliy Bayraq Kününe Kiyevde bir sıra tedbirniñ keçirilmesi planlaştırıla, olarnıñ arasında – Ukrainada qırımtatarlarnıñ eñ büyük milliy bayrağınıñ açılması.

Bunı Ukraina prezidentiniñ qırımtatarlarnıñ işlerinden vekâletlisi Mustafa Cemilevniñ matbuat hızmeti bildire.

Programmağa köre, cuma künü saat 19:00 Kiyevniñ Şevçenko bağçasında keçirilecek tedbirni Qırımtatar Milliy Meclis yolbaşçılığı açacaqtır.

«İştirakçiler, Ukrainada eñ büyük qırımtatar bayrağını açıp, birlik timsaline toquna bilecekler», – denile beyanatta.

Bunıñ ile qırımtatar estradasınıñ yaş yıldızlarınıñ çıqışları, «Qırım – menim Vatanım» bala resimleriniñ yarışı, «Birlik yolu» avto yürüşi planlaştırıla. Tedbirniñ soñunda iftarnıñ keçirilmesi beklenile.

Aqmescit akimiyeti iyün 26 künü qayd etilgen Qırımtatar milliy bayraq Kününe tedbir ve avto yürüşleriniñ teşkilâtçılarına bayramnı keçirmege üç kere yasaq etti. Bu sebepten qırımtatarlarnı evler ve maşinalarını milliy bayraqlarnen yaraştırmağa çağıralar.

Evel bildirilgeni kibi, iyün 3 künü Kiyevde fleş mob başlandı, maqsadı – qırımtatar bayrağını Ukraina şeerlerinden keçirip, destek timsali olaraq onı qırımlılarğa bermek.

Kiyevde Qırımtatar milliy bayraq Kününi marş, avto yürüşi, sergi ile qayd etecekler.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

Ukrainada iyün 26 Qırımtatar bayrağı kününe bağışlanğan «Eki bayraq – bir memleket» kampaniyası «Qırım – Ukrainadır» kampaniyasınıñ devamıdır.

XS
SM
MD
LG