Link açıqlığı

Ukraina prezidentiniñ qırımtatarlarnıñ işlerinden vekâletlisi Mustafa Cemilevniñ ofisi Ukraina Medeniyet nazirligine qırımtatar tiliniñ latin urufatınıñ kirsetilmesi ile bağlı teklifi ile muracaat etti. Mütenasip mektüp Ukraina baş nazir muavini olğan medeniyet naziri Vâçeslav Kirilenko adına yollanıldı.

«Öyle oldı ki, qırımtatar tiliniñ kitabeti bir qaç kere islâattan keçti, amma SSCB vaqtında onıñ kirill elifbesine keçüvi eñ zor mesele oldı. Qırımtatar tiliniñ fonetik tertibatını köz ögüne alğan mütehassıslar defalarca qırımtatar tiliniñ latin urufatına keçüviniñ zaruriyeti aqta sualni kötergen edi», – denile Vekâletliniñ matbuat hızmetiniñ beyanatında.

Qırımtatar Milliy Qurultayı 1993 senesi qırımtatar tiliniñ latin urufatı esasındaki yañı elifbesini qabul etti. 1997 senesi Qırım Yuqarı Şurası qırımtatar tiliniñ elifbesini latin urufatına keçirmek kibi qararnı aldı, amma işbu qararnı müddetinde öyle de amelge keçirmediler.

«Nazirlikniñ devlet til siyaseti boyunca vekâletini közde tutıp, qırımtatar tiliniñ latin urufatı negizinde qullanılması boyunca sualni baqıp çıqmağa rica etem. Şu cümleden, latin urufatına keçüv vazifelerini, basamaqlarını ve planlaştırılğan tedbirlerniñ yapılması üzerinde nezaretni», – dep yaza qırımtatarlarnıñ yetekçisi Mustafa Cemilev.

Nazirge Vekâletliniñ faaliyetini temin etken bölük mütehassıslarınıñ işbu meselege qoşulmağa azır olğanları aqta haber ettiler.

XS
SM
MD
LG