Aluştada plâj kirişi içün 1200 ruble tura (tahminen 20 dollar). Evel Aluştanıñ Radisson musafirhanesiniñ şahsiy mülkiyetine keçken plâj aqqında söz kete, dey Qırımnıñ rusiyeli ükümetiniñ kurort ve turizm naziri Sergey Strelbitskiy.
Bu aqta o iyün 23 künü Qırım Nazirler şurasınıñ toplaşuvında ayttı, haber ete Qırım.Aqiqat.
«Bizge miras olıp qalğan bir şey. Aluştada şahsiy mülkiyet şekli olğan Radisson musafirhanesiniñ yalı kenarı. Mında tek para tölep kirmege mümkün. Hadimlerimiz bildirgeni kibi, kiriş 1200 ruble tura», – dey Qırım Kurort naziri.
Qırımnıñ rusiyeli başı Sergey Aksönov prokuraturadan bu meseleni al etmege talap etti. Umumen ise, dey nazir, Qırımda plâjlar ile vaziyet bir qarardır. Bu sene sayısı – 473. Şu cümleden, 80 – şifaiy, 60 – bala, digerleri – er kes içün.
Toplaşuvda qayd etilgeni kibi, şeerler tışında bar olğan «kiyik» plâjlar ile problemler mevcut. Aksenov bu kibi territoriyalarnı temizlemek içün ne qadar tehnika kerek olğanı aqta malümatnı azırlamağa teklif etti.
