Kiyevde köçip kelgenlerniñ problemleri ile oğraşqan «KrımSOS» teşebbüsi iyün 22 künü Maydanda açlıq tutqan qırımlı Server Abibulayevge Ukraina Yuqarı Şurası yanındaki insan aqları boyunca vekâletliniñ temsilcisi Janna Lukyanenkonıñ ziyareti aqta bildire. O, adamğa yardım etmege söz berdi. Cemaatçılar aytqanı kibi, açlıq tutqanğa ekimler glükoza iñektsiyalarını yapalar.
«Abibulayevniñ alı beterleşe, ömrüni saqlamaq içün mında daima acele yardım kelip, oña glükoza sançuvını yapalar. Şimdi ayatı içün telüke yoqtır, amma sağlığına aqibetlerniñ neticesi qorqunçlı ola bile», – deyler teşkilâtta.
«KrımSOS»ta deyler ki, Lukyanenko qırımlınen körüşip, onıñ meselesi ile terence oğraşaycağını qayd etti, «meseleniñ çezilmesine bütün zaruriy teşkilâtlarnı celp etmege» söz berdi.
Abibulayev oña mesken ve Ukraina içtimaiy siyaset naziri Pavlo Rozenko tarafından tasdiqlanılğan yollanmanıñ berilmesini talap ete.
«Açlıq tutqan adamnen laf etkende, ombudsmenniñ temsilcisi bu sual İçtimaiy siyaset nazirliginiñ vazifesi degil de, bu yerli memuriyet ve cemiyetlerniñ vazifesi olğanını bildirdi ve qırımlınıñ böyle talapları yerine ketirilmez», – denile beyanatta.
Qırım.Aqiqat bildirgeni kibi, Kiyevde afta devamında 56 yaşında qırımtatarı, mecburen köçip kelgen Server Abibulayev «akimiyetniñ nizamsızlığına» qarşı açlıq tuta. Er kişi Euromaydan faali olğanını ayta. O, Rusiye Qırımnı işğal etken soñ ketti, amma şimdi ne yaşaycaq yeri, ne de aşaycaq şeyi bar.
Ukraina prezidentiniñ Qırımtatar halqı işlerinden vekâletlisiniñ ofisinde hızmet bu vaziyetni nezaret ete ve qırımlığa yardım etmege azır, dep bildirdiler.
