Qırım paytahtında iyül 15-den avtomobil yollarınıñ tamir işleri başlanacaq, dedi Qırımnıñ rusiyeli Devlet şurasınıñ iqtisadiy, maliyeviy ve bergi siyaseti boyunca komitet reisi Vitaliy Nahlupin.
Bunı Qırım parlamentiniñ matbuat hızmeti bildire.
Onıñ sözlerine köre, al-azırda Aqmescitte 2015 senesi avgust 1-ne qadar biritilmesi planlaştırılğan tamir işleri keçirile.
«İyül 15-den biz Aqmescitniñ belediye yollarınıñ tamirine başlaycaqmız. Buña ayırılğan para miqdarı – 800 mln ruble», – dey Nahlupin.
O şunı da bildirdi ki, Qırım yollarınıñ tamirine 5,5 mlrd ruble miqdarında qoşma para vastalarını ayıracaqlar.
«Bir milliard ruble Aqmescit şeeri yollarınıñ tamirine ayırıla, 4,5 milliard – «Aqmescit» halqara ava limanından Yalta şeerine qadar avtomobil yolunıñ tamirine», – dey o.
Aqmescitte iyün 9 künü küçlü yağmurdan soñ bazı soqaqlardaki asfalt suvnen yuvuldı. Şu cümleden, asfaltsız qısmen Krılova soqağı qaldı. Aqmescit memuriyetiniñ başı Gennadiy Baharev aytqanı kibi, şeer yollarında yapılğan işler – tam tamir degil de, «yol ketenniñ saqlanılması boyunca areket»tir.
