2015 senesi iyün 18 künü alınğan qanun boyunca prezident unvanını coyğan 2010-2014 seneleri Ukraina prezidenti Viktor Yanukoviç Qırımda «referendumnıñ» keçirilüvi ve soñra Rusiye işğaliniñ sebebi – qırımlılar tarafından Maydan mefküresiniñ begenmemesi olğanı aqta bildirdi.
Bunı Yanukoviç BBC kanalına bildirdi.
«Maydan em Qırım, em Donbass, em Ukraina cenübiy-şarqnı öz radikal baqışları ile qorquzdı. Bu eñ müim meseledir, onıñ neticesinde eali halq imayesini teşkil etip, özüni qorumağa başladı. Qırım Yuqarı Şurası da referendumnı keçirmege qarar aldı. Mında Rusiyeniñ mevamı ne edi? Rusiye bu ziddiyetten çette qalıp olamadı. Ebet, qalıp olamaz edi», – dey Yanukoviç.
Qırımda qanunsız referendumnıñ keçirilüv sebebi olaraq Yanukoviç ealiniñ kelecegi içün qorqunı adladı.
«Qırım referendumnı keçirgende, insanlar kelecegi, balalarnıñ kelecegi içün qasevet çeke edi», – dedi Yanukoviç.
«Maydan yapqanınıñ aqibetidir. Adet üzre Rusiye tarafdarı olğan ealini qorqutqan radikal milletçilikniñ aqibetidir», – dep qoştı Yanukoviç.
Qırımnıñ qaytarıluvı aqta Yanukoviç böyle ayttı: «Bugün endi olıp keçken bir şey. Amma bugün cenk kete. Qırım aqqında aytmaq, Qırımnı qaytarırmız dep…Nasıl? Cenknen? Daa cenk kerekmi?»
Ukrainada bir qaç cinaiy işniñ iştirakçisi olğan ve İnterpol tarafından qıdıruvğa ilân etilgen Viktor Yanukoviç 2014 senesi fevral 22 künü Kiyevden qaçıp, Ukrainanı terk etti. Şimdi o Rusiyede buluna.
