Link açıqlığı

Qırımtatar bayrağı kününe Ukrainada «Eki bayraq – bir memleket» kampaniyasını teşkil ettiler


Ukrainada iyün 26 Qırımtatar bayrağı kününe bağışlanğan «Eki bayraq – bir memleket» kampaniyası «Qırım – Ukrainadır» kampaniyasınıñ devamıdır.

Bu aqta Ukraina haber siyaseti naziriniñ keñeşçisi Sergey Kоstinskiy bildire.

Onıñ malümatına köre, kampaniya Ukraina Haber siyaseti Nazirliginiñ, Ukraina prezidentiniñ qırımtatarlarnıñ işlerinden vekâletlisi ve Qırımtatar Milliy Meclisiniñ umumiy leyhası ola.

«Hatırlatam, büyük kampaniyanıñ birinci pıtağı – mayıs 18 künü Qırımtatarlarnıñ sürgünlik qurbanlarını hatıra kününe bağışlanğan «Mayıs 18 künü epimiz – qırımtatarmız» teşebbüsi oldı», – dey Kоstinskiy.

Aqmescit akimiyeti iyün 26 künü qayd etilgen Qırımtatar milliy bayraq Kününe tedbir ve avto yürüşleriniñ teşkilâtçılarına bayramnı keçirmege üç kere yasaq etti. Bu sebepten qırımtatarlarnı evler ve maşinalarını milliy bayraqlarnen yaraştırmağa çağıralar.

Evel bildirilgeni kibi, iyün 3 künü Kiyevde fleş mob başlandı, maqsadı – qırımtatar bayrağını Ukraina şeerlerinden keçirip, destek timsali olaraq onı qırımlılarğa bermek.

Kiyevde Qırımtatar milliy bayraq Kününi marş, avto yürüşi, sergi ile qayd etecekler.

Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.

XS
SM
MD
LG