Haber siyaseti naziri Yuriy Stets «ATR Group» qırımtatar media-holdinginiñ saibi Lenur İslâmov ile körüşip, «ATR», «LALE» telekanalları ve «Meydan»radiosınıñ inkişafını muzakere etti.
Bu aqta Ukraina Haber siyaseti Nazirliginiñ saytında aytıla.
İslâmovnıñ aytqanı kibi, printsipial suallerden biri – Qırımda qalğan jurnalistlerniñ qoruvıdır.
«Kiyevde «ATR» muarrirligi ayrı yuridik şahıstır, ayır taqım, amma Qırımda qalğan jurnalistlerni qoruv mehanizmi işletilmeli. Yerli akimiyet olarnı telekanalnıñ mustaqil siyasetine basqı aleti olaraq qullanmasın», – dey media-holdingniñ saibi.
Olğan malümatqa köre, haber siyaseti naziri onıñ müessisesi «işğal etilgen Qırımda jurnalist aqlarınıñ qoruvı boyunca bir sıra qararlarnıñ işlep çıqarğanı» aqta bildirdi.
«ATR» telekanalı strategik Qırım matbuat vastalarından biri ola, onıñ sayesinde Qırımda haber qamaçavı bozuldı. Neticede, qırımlılarnıñ büyük bir qısmı yarımada ve Ukrainada olğan vaqialar aqqında doğru malümatqa irişimni elde etti. Telekanalnıñ inkişafı ve jurnalistleriniñ havfsızlığı – nazirlikniñ esas vazifelerinden biri ola», – dedi körüşüvde Stets.
ATR yolbaşçılığı Kiyevde iyün 18 künü keçken matbuat konferentsiyaında qıtaiy Ukrainadan yayınlavnıñ pekitilecegi aqqında bildirdi. Bunıñ ile telekanal saibi Lenur İslâmov Qırımda qalğan hadimler bu ketişatta iştirak etmegenini qayd etti.
ATR yayınlavınıñ yañartuvı aqqında iyün 17 künü belli oldı, çarşenbe künü aqşam telekanal efirini Bağçasaray Han sarayında gimnniñ icrasından başladı. «Lâle» bala telekanalı da işke devam etti.
Aprel 1-den dünyada yekâne ATR qırımtatar telekanalı, Rusiye litsenziyasını elde etalmayıp, yarımadada yayınlavını toqtattı.
ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete
Birazdan telekanalda şunı bildirdiler ki, ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete eken.
ATR yayınlavınıñ toqtatılması ile cumhuriyet akimiyeti qırımtatar cemaat telekanalını teşkil etmek teşebbüsini bildirdi. Onıñ fikrine köre, bu kanal qırımtatarlarnıñ doğru malümatnı elde etmek aqqını teminler.
