Aqmescit akimiyeti iyün 26 künü qayd etilgen Qırımtatar milliy bayraq Kününe tedbir ve avto yürüşleriniñ teşkilâtçılarına bayramnı keçirmege üç kere yasaq etti. Bu sebepten qırımtatarlarnı evler ve maşinalarını milliy bayraqlarnen yaraştırmağa çağıralar.
Bu aqta Qırımtatar Milliy Bayraq Kününe bağışlanğan merasimlerni azırlağan teşkiliy komitetniñ beyanatında aytıla, haber ete Qırım.Aqiqat.
«Teşkiliy komitet milletni birleştirmek ve vatanperverlik duyğusını kötermek maqsadınen iyün 26 künü arfesinde qırımtatar milliy timsallerini rağbetleştirmege çağıra: evlerde bayraqlarnı kötermege, maşinalarda asmağa, milliy timsallerini urbada qullanmağa ve ilâhre», – denile beyanatta.
Beyanatta qayd etilgeni kibi, teşkiliy komitet üç kere Aqmescit memuriyetine tedbirniñ keçrilmesi boyunca arizalarnı bergen edi.
«Amma cevapları aynı birincisi kibi edi. Avto yürüşiniñ keçirilmesine de red cevabı keldi», – deyler beyanatta.
Bu sebepten Teşkiliy komitet 2015 senesi iyün 26 künü kütleviy tedbirlerni keçirmeycegi aqta bildire. Amma mında şunı qayd ettiler ki, Qırımtatar Milliy Bayraq Kününde keçirilgen adetiy kvest, foto yarışı, bala resimleri yarışı bu sene de olacaqtır. Keçirilüv yeri aqqında birazdan bildirecek olalar.
Evel bildirilgeni kibi, iyün 3 künü Kiyevde fleş mob başlandı, maqsadı – qırımtatar bayrağını Ukraina şeerlerinden keçirip, destek timsali olaraq onı qırımlılarğa bermek.
Kiyevde Qırımtatar milliy bayraq Kününi marş, avto yürüşi, sergi ile qayd etecekler.
Qırımtatarlarnıñ bayrağı – üstünde altın tamğa tasvir etilgen kök tüslü ketendir. Qırımtatar bayraq künü 2009 senesi teşkil etildi.
