Pirogovoda Milliy mimarcılıq ve turmuş müzeyinde iyün 21 künü «Krayina mriy» on ekinci halqara qavmiy festivali keçti. Populâr meydançıqlarından biri qırımtatar medeniyetini taqdim etken «Qırım alanı» oldı.
Bu sene festivalde bir 40 meydançıq bar edi. Mında ziyaretçiler ukrain ünerleri boyunca master klasslarda iştirak ete bile edi. Bunıñ ile musafirler el sanatları mahsulatını, savut, ilvan, milliy ukrain kiymini satın ala bile edi.
Festivalniñ muzıka sanaları yüzge yaqın taqımnı topladı, olarnıñ arasında Bumboks, TNMK, Voplі Vіdoplâsova, Acoustic Quartet, Jadan i Sobaki, ONUKA, Magazin mısley.
«Qırım alanında» beşinci kere qırımtatar medeniyetini taqdim ettiler. Meydançıqnıñ teşkilâtçısı Tamila Taşevanıñ aytqanı kibi, qırımtatar meydançığı eñ populâr yerlerden biri oldı, insanlar çiberek ve pilâvğa bir buçuq saat devamında nevbette tura edi.
«Ukrain ve qırımtatar medeniyetleriniñ umumiy hususiyetleri çoq. Qırım işğali ile bağlı facialı vaqialardan sebep qırımtatarlarğa ve qırımtatar medeniyetine meraq artqanını köremiz», – dey Taşeva.
«Krayina mrіy» Ukraina içün – Ukraina inkişafınıñ timsalidir. Mükemmel memleketni arz etken insanlarnı toplaymız. Bu memleketni quramız. Başta festival çerçivesinde, soñra bu tecribeni cemiyette qullana bilemiz. Festival ğayelerinden biri – qavmiy ekologik ayat, insanlar ile saf munasebetler. Em, elbette ki, mında vatanperverlik de bar. 12 yıl içerisinde qavmiy şeyler pek mot oldı», – dedi festivalniñ teşebbüsçisi Oleg Skripka.
«Krayina mrіy» – Kiyevde eñ büyük open-air, Ukrainada miqyaslı world music. Bu sene tedbirde 3 muzıka sanası oldı: World Music Stage, Ethno-Jazz Stage ve Disco-Lounge Stage. Mında eñ eyi ukrain ve halqara çalğıcıları çıqışta buluna.
