Link açıqlığı

Qırım ve Donbasstan köçip kelgenler aqqında sanalaştıruvnı Zaporojye şeerinde kösterdiler


Zaporojyede «Renksiz alan» vesiqalı sanalaştıruvnı kösterdiler. Qırım ve Donbasstan köçip kelgenlerniñ 15 ikâyesi bir buçuq saatlik sanalaştıruvnıñ negizi oldı. Stsenariyni Kirovograd şeeriniñ sakinleri Den ve Yana Gemeni azırladılar, rejissör – Qırımdan köçip kelgen Galina Cikayeva oldı, dep bildire Radіo Svoboda.

«Kiyevge kelgende, bizim Maydan ve ATO zonasında olğan vaqialar aqqında «Cumhuriyet» institutı ile «Ayat teregi» birinci leyhamız olğan edi. Olduqça muvafaqiyetli edi. Ebert fondu köçip kelgenler aqqında vesiqalı numayışnı azırlamağa ğayemizge qol tuttı. Şekilni deñiştirmege qarar aldıq. İnsanlarnıñ çoqusı qıtaiy Ukrainağa köçmege mecbur oldı. İnsanlarnı körgende, olarnıñ ikâyeleri daa da kergin olğanını añlay edim. İnsanlar Qırımğa bara bile, men – yoq. Amma daa da qorqunçlı vaqialarnı yaşağan insanlar bar. Patlavlar, telefler, namusqa keçüvler», – dedi Cikayeva.

Leyha iştirakçilerinden bir qısmı endi Kiyevde 2014 senesi küzde taqdim etilgen «Ayat teregi» içtimaiy-siyasiy sanalaştıruvda iştirak etken edi. Aktörlar arasında Kiyev, Çernovtsı, Zaporojye ve Qırım sakinleri.

«Men – Kiyev sakini, arbiy areketlerniñ iştirakçisi, afğanlı. Bıltır jurnalist olaraq bütün yaz devamında Şarqta bulundım. Farqlı vaqialar bar. Bazıları köçe, çünki başqa çıqış yoq. Bazıları şeer, aile, ev, memleketni nasıl bıraqmağa bilmeyip qala. Sual: «Qayda?». Kimerleri Kiyevge köçe, çünki mında em imkân, em bedava şey çoq, göñülliler er şeyni bere bile, maña da er kes borclu. Siz yaramaysız, men yahşım. Bazıda öyle de ola, – dey aktrisa Natalya.– İnsanlarnıñ çoqusı memleket suniy şekilde cenkke çekilgenini tüşüne. Er kesniñ öz noqtaiy nazarı bar. Ve böyle olmasına olarnıñ aqları da bardır. Biz şimdi yaşamaq ve öz memleketinde mecburen köçip kelgen insanlarnı añlamağa tırışmaq kerekmiz».

Zaporojyeden ğayrı, spektaklni Odessa, Ujgorod, Kiyev,Çernovtsı, Severodonetskte kösterecekler. Spektaklni «Cumhuriyet» İnstitutı ve Ukrainada Fridrih Ebert fondunıñ temsilciliginiñ yardımı ile azırladılar.

XS
SM
MD
LG