Qırımtatar Milliy Meclisi ATR qırımtatar telekanalınıñ Kiyevden sputnik ve internet vastası ile yañartılmasını «haber qamaçavınıñ yoq etilmesi» olaraq adladı. Meclis reisiniñ muavini İlmi Ümerov telekanal yolbaşçılığı doğru qarar alğanını tüşüne.
Bunı Meclisniñ matbuat hızmeti bildire.
«Bu aqiqatnı aytmağa ve kerek ve istenilgen şeylerni köstermege izin berer. Şimdi, Qırım Rusiye tarafından nezaret etilgende, söz serbestligi aqqında arz emege de kerekmey. Qırım sakinlerine doğru malümat kerek, onı ATR bere bile. Biz sağındıq — sabırsızlıqnen bekleymiz», – dep bildire Ümerovnıñ sözlerini matbuat hızmeti.
Programmalarnıñ, şu cümleden bala yayınlarınıñ yañartılması qırımtatar halqı içün haber, içtimaiy-medeniy, cemiyet-siyasiy noqtaiy nazardan pek emiyetlidir, dep tüşüne Qırımtatar Milliy meclisiniñ qırımtatar matbuat vastalarınıñ inkişafı boyunca idaresiniñ reisi Gayana Yüksel.
«Telekanal yayınlavınıñ böyle şaraitlerde zemaneyi tehnikiy imkânlar vastası ile yañartılması Qırımda media saasında olğan vaqialarğa lâyıq bir cevap oldı. İlk evelâ, bu Qırım akimiyeti qırımtatarlarnı qaplap alğan haber qamaçavından bir çıqıştır», – dey o.
ATR yolbaşçılığı Kiyevde iyün 18 künü keçken matbuat konferentsiyaında qıtaiy Ukrainadan yayınlavnıñ pekitilecegi aqqında bildirdi. Bunıñ ile telekanal saibi Lenur İslâmov Qırımda qalğan hadimler bu ketişatta iştirak etmegenini qayd etti.
ATR yayınlavınıñ yañartuvı aqqında iyün 17 künü belli oldı, çarşenbe künü aqşam telekanal efirini Bağçasaray Han sarayında gimnniñ icrasından başladı. «Lâle» bala telekanalı da işke devam etti.
Aprel 1-den dünyada yekâne ATR qırımtatar telekanalı, Rusiye litsenziyasını elde etalmayıp, yarımadada yayınlavını toqtattı.
ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete
Birazdan telekanalda şunı bildirdiler ki, ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete eken.
ATR yayınlavınıñ toqtatılması ile cumhuriyet akimiyeti qırımtatar cemaat telekanalını teşkil etmek teşebbüsini bildirdi. Onıñ fikrine köre, bu kanal qırımtatarlarnıñ doğru malümatnı elde etmek aqqını teminler.
