Qırımtatar Milliy Meclisiniñ qırımtatar tilinde tasil meseleleri boyunca idare reberi Emine Avamileva Qırımda qırımtatar ve ukrain tilleriniñ ögretüvi ile vaziyet kerginleşkeni aqta bildirdi. Onıñ aytqanı kibi, yerli siyasetçiler eminler ki, Qırımda bu tillerni göñülli olaraq ögrenmege istegen insan yoq.
Bunı o Ukrinform saytına bildirdi
«Bunıñ ile, malümatımızğa köre, Qırım umumtasil mekteplerinde talebelerniñ 30% – qırımtatarlarıdır. Amma bunıñ ile şimdi 15 milliy mektepte oquğan balalarımıznıñ tek 3% tuvğan tilini ögrene bile. Qırımda balalarnıñ 50, kimerde 75% qırımtatarı olğan mektepler bar, amma tuvğan tilni ögrenmege olarğa imkân bermeyler. Bu imkânnı qazanmaq kerek. Neticede Qırımda balalarnıñ 96% tasilni rusça ala. Aqılğa sığmağan bir şey», – dey Avamileva.
Onıñ aytqanı kibi, yarımadada qırımtatar ve ukrain tillerinde oqutuv ile vaziyet aynıdır.
«Biz tuvğan tilde oqutuvnıñ em kefaleti, em miqdarı ile bağlı vaziyetniñ beterleşüvini tahmin etemiz. Rusiyede 10-11 sınıflarda oqutuv yalıñız rus tilinde keçe, tuvğan til ise yalıñız bir fen olaraq ögrenile», – dedi Avamileva.
O emindir ki, vaziyetni Qırımda devlet tillerniñ musaviyligini talap etecek ana-babalar, cemaatçılıq qorçalay bile.
Qırımnıñ Rusiye Devlet şurasınıñ tasil, ilim, gençlik siyaseti ve sport komiteti spiker muavini Remzi İlyasovnıñ tasil aqqında qanun leyhasına cumhuriyette qırımtatarca ve ukrainceniñ mecburiy ögrenilmesini kirsetmek teklifini red etti.
Qırım spikeriniñ muavini Remzi İlyasov Devlet şurasında «Qırım Cumhuriyetinde devlet ve diger tillerniñ qullanması aqqında» qanun leyhasını kirsetken edi. Vesiqağa binaen, qırımtatar ve ukrain tilleri, rus tilinen aynı derecede, cumhuriyetniñ tasil müessiselerinde mecburiy ögrenilmek kerek.
Cemaatçılarnıñ bildirgenine köre, Qırım Rusiye nezaretine keçken soñ yarımada mekteplerinde devlet tilleri aynı seviyede ögrenilmey. Rusça dersleri aftada 5 saat ya da 6 saat olsa, qırımtatarca ya da ukraince fakultativ olaraq ögrenile ya da iç ögrenilmey.
