Link açıqlığı

Ukraina Yuqarı Şurasınıñ deputatı Mustafa Cemilevniñ oğlu Hayser Cemilevniñ imayesi Krasnodar diyar mahkemesi tarafından çıqarılğan ükümge itirazını bildirecek, – haber ete Qırım.Aqiqat.

Bunı tvitterde iyün 19 künü Hayser Cemilevniñ advokatı Nikolay Polozov bildirdi.

«Hayser Cemilevniñ işi boyunca ükümge itiraz arizasını berdim. Onı Rusiye Yuqarı Şurasınıñ eyyeti baqacaqtır. Mahkemeci olmağanlarnıñ qararına qarşı çıqmayıp, Cemilevniñ işi boyunca üküm bütünley lâğu etilmek, cinaiy iş – toqtatılmaq kerek», – dedi Polozov.

İyün 2 künü Krasnodar mahkemesinde mahkemeci olmağanlar maqsatlı öldürüvde qabaatlanğan Hayser Cemilevni aqladılar. Mahkemeci olmağanlar Cemilevni silâ emaneti ve muqaytsızlıqtan yapılğan öldürüvde qabaatlı olaraq tanıdılar.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler.

Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG