Cuma künü, iyün 19-da, Aqmescit ava limanında millionuncı turistni qarşıladılar. Bunı Qırımnıñ Kurort ve turizm nazirliginiñ matbuat hızmetinde bildirdiler, – haber ete TASS.
«Bu sene millionuncı turist Sankt-Peterburgdan kelgen Tatyana Şubina oldı. Oña sertifikat, Qırım Devlet şurasından ediye sertifikatı, «Yurigemnen Qırımnı sayladım» aktsiyasında iştirak etüvge davetname, yarımada boyunca ekskursiyağa sertifikat bağışlanıldı», – deyler matbuat hızmetinde.
Qırım ve Aqyar turoperatorları Birliginiñ prezidenti Boris Zelinskiy aytqanı kibi, «bu sene turistik mevsimi muvafaqiyetli olacağını tasdiqlağan delildir».
«Bu sene Qırımğa kelmege istegen turistlerniñ aqımı arttı. Ava limanımızğa seferlerniñ miqdarı arttı, em de parom keçitinde endi nevbetler yoq», – dey o.
Qırımnıñ rusiyeli akimiyeti 2015 senesi yarımadağa 5 million turist kelecegi aqqında ayta.
