Link açıqlığı

Aqmescitniñ merkeziy camisinde iftarğa bir 150 insan toplandı


Aqmescitniñ merkeziy Kebir camisinde birinci iftar keçti.

Qırım.Aqiqat bildirgeni kibi, Qırım ve Aqyar musulmanları diniy idaresi tarafından azırlanılğan iftarğa bir 150 insan toplandı.

Tedbirniñ başlanuvından evel oraza tutqan qadın ve erkekler namazlarını qıldı, mında Qırım musulmanlarınıñ müftisi Emirali Ablayev de bulunğan edi.

İftarğa kelgenlerni teşkilâtçılar arap hurması, muz, şurpa, pilâv ve sıcaq içimlikler ile sıyladılar. Erkek ve qadınlar çadırlarda ayrı-ayrı otura edi. Bazıları ufaq balaları ile keldi.

Bedava iftarlar Qırımnıñ diger camilerinde de keçirilecektir. Olar ay devamında keçecek.

Hatırlatamız, muqaddes Ramadan ayı bu sene iyün 18 künü başlandı ve iyül 16-na qadar devam etecektir. Ramadan muqaddes ayı devamında musulmanlar oraza tutmalı, yani kündüz aş ve suvdan vazgeçmeli. Orazadan ağırayaqlı ve emizdirgen qadınlar, yedi yaşqa yetmegen balalar, hasta ve qart insanlar, seyahatçılar boşatıla.

XS
SM
MD
LG