Qırımda Rusiye uquq qoruyıcıları tarafından «fevral 26» işi boyunca yaqalanğan ve Aqmescit SİZOsında tutulğan ATR telekanalınıñ operatorı Eskender Nebiyevni azat ettiler. Bunı iyün 18 künü ATR baş müdiriniñ muavini Lilâ Bucurova öz Facebook saifesinde yazdı, dep haber ete Qırım.Aqiqat.
«Soñki ayları SİZOda bulunğan operator Eskender Nebiyevni azat ettiler. Onıñ ailesine yardım etken er keske minnetdarmız. Müftiy Emirali efendige ayrı teşekkür, onıñ yardımı olmasa, bu da olamaz edi», – dey Bucurova.
2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.
