Qırımnıñ rusiyeli devlet şurasınnı haber siyaseti, bağ ve kütleviy kommunikatsiya boyunca komitetiniñ reisi Sergey Şuvaynikov sputnikten yayınlavını pekitken ATR telekanalınıñ jurnalistleri levhalarnı azırlap, Rusiye qanuniyetini bozsalar, mesuliуet çekecegi aqqında bildirdi.
Bunı o Qırım.Aqiqat sayıtna ayttı.
«Muayyen mesulуiet meselesi peyda ola, çünki nasıldır bir Rusiye qanuniyetine ters kelgen levhalar azırlanılıp, Qırımğa yollanılsa, nezaret müessiseleri vatandaşlarğa itirazını bildirde bilecek», – dedi Şuvaynikov.
O, ATR telekanalınıñ Kiyevden işleycegine menfiy munasebette bulunğanını da ayttı, çünki Ukraina şimdi «Rusiyeli Qırım ile haber cenki vaziyetinde buluna».
ATR yolbaşçılığı Kiyevde iyün 18 künü keçken matbuat konferentsiyaında qıtaiy Ukrainadan yayınlavnıñ pekitilecegi aqqında bildirdi. Bunıñ ile telekanal saibi Lenur İslâmov Qırımda qalğan hadimler bu ketişatta iştirak etmegenini qayd etti.
ATR yayınlavınıñ yañartuvı aqqında iyün 17 künü belli oldı, çarşenbe künü aqşam telekanal efirini Bağçasaray Han sarayında gimnniñ icrasından başladı. «Lâle» bala telekanalı da işke devam etti.
Aprel 1-den dünyada yekâne ATR qırımtatar telekanalı, Rusiye litsenziyasını elde etalmayıp, yarımadada yayınlavını toqtattı.
ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete
Birazdan telekanalda şunı bildirdiler ki, ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete eken.
ATR yayınlavınıñ toqtatılması ile cumhuriyet akimiyeti qırımtatar cemaat telekanalını teşkil etmek teşebbüsini bildirdi. Onıñ fikrine köre, bu kanal qırımtatarlarnıñ doğru malümatnı elde etmek aqqını teminler.
