ATR telekanalınıñ saibi Lenur İslâmov Kiyevden yayınlavnıñ sputnik vastası ile yañartuvı onıñ şahsiy qararı olğanı aqta bildirdi. Qırımda qalğan telekanal hadimleri bunda iştirak etmey.
Bunı o iyün 18 künü Kiyevde matbuat konferentsiyası devamında bildirdi, haber ete Qırım.Aqiqat.
«Bu suallerniñ olacağını tahmin etem, şunıñ içün bu menim qararım olğanını birden aytam, Qırımda qalıp, qıtağa köçmemek qararnı alğan jurnalistler bunda iştirak etmey», – dey İslâmov.
Onıñ malümatnıa köre, Kiyevde telekanal içün endi eki oda kirağa alındı, mından iyün 17 künü yayınlav yañartıldı.
«Arhivimiz bar, kollektivimiz, muarririyetimiz bar. <…> Jurnalistler – serbest insanlardır, jurnalistlerge iç yuir vaqıt basqı etmedim, maña uyğun degil. Qırımda qalğanlarnı belâda qaldırmamız, amma anda olğanlarnıñ buña alâqası iç te yoq. Mahsus bunı qayd etem, problemleri olmasın», – dedi İslâmov.
O, Qırımda qalğan hadimleri alâ daa yerli akimiyet ve uquq qoruyıcı organlarınıñ basqısı altında olğanını bildirdi.
«Qırımda insanlarğa Qırımnıñ Ukrainağa qaytarılaсağına ümüt beremiz deyler, insanlardan eñ soñ işançnı tutıp almaq isteyler», – dey ATR saibi.
ATR yayınlavınıñ yañartuvı aqqında iyün 17 künü belli oldı, çarşenbe künü aqşam telekanal efirini Bağçasaray Han sarayında gimnniñ icrasından başladı. «Lâle» bala telekanalı da işke devam etti.
Qırımnıñ rusiyeli akimiyetinden bu aqta izaatı daa yoqtır.
Aprel 1-den dünyada yekâne ATR qırımtatar telekanalı, Rusiye litsenziyasını elde etalmayıp, yarımadada yayınlavını toqtattı.
ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete
Birazdan telekanalda şunı bildirdiler ki, ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete eken.
ATR yayınlavınıñ toqtatılması ile cumhuriyet akimiyeti qırımtatar cemaat telekanalını teşkil etmek teşebbüsini bildirdi. Onıñ fikrine köre, bu kanal qırımtatarlarnıñ doğru malümatnı elde etmek aqqını teminler.
