Link açıqlığı

Qırımtatar Milliy Meclis reisi Refat Çubarov ATR telekanalı qıtaiy Ukrainada yayınlavnı ğayrıdan tiklep, işke Ukraina devletinden maliyeviy yardımnı soramayıp, devam etecegini bildirdi.

Bunı o iyün 18 künü Kiyevde matbuat konferentsiyası devamında bildirdi, haber ete Qırım.Aqiqat.

«Ukraina devletinden aqça soramaycamız, halqara fond ve diger memleket ükümetlerine muracaat etecekmiz. Halqımız daimiy ayırım ve repressiyalar şaraitlerinde yaşağanını köz ögümizge alıp, telekanal içün yardımnı grantlar şeklinde qıdıracaqmız. Telekanal ükümetinden aqça almayıp, mustaqilligini saqlaycaq», – dedi Çubarov.

ATR yayınlavınıñ yañartuvı aqqında iyün 17 künü belli oldı, çarşenbe künü aqşam telekanal efirini Bağçasaray Han sarayında gimnniñ icrasından başladı. «Lâle» bala telekanalı da işke devam etti.

Qırımnıñ rusiyeli akimiyetinden bu aqta izaatı daa yoqtır.

Aprel 1-den dünyada yekâne ATR qırımtatar telekanalı, Rusiye litsenziyasını elde etalmayıp, yarımadada yayınlavını toqtattı.

ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete

Birazdan telekanalda şunı bildirdiler ki, ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete eken.

ATR yayınlavınıñ toqtatılması ile cumhuriyet akimiyeti qırımtatar cemaat telekanalını teşkil etmek teşebbüsini bildirdi. Onıñ fikrine köre, bu kanal qırımtatarlarnıñ doğru malümatnı elde etmek aqqını teminler.

XS
SM
MD
LG