Ukraina Haber siyaseti naziriniñ keñeşçisi Sergiy Kostınskıy ATR qırımtatar telekanalı yayınlavınıñ Kiyevde yañartılacağı aqqında bildirdi.
Onıñ malümatına köre, bu mevzuda iyün 18 künü Ukraina paytahtında telekanal saibi Lenur İslâmov ve Qırımtatar Milliy Meclisiniñ reisi Refat Çubarovnıñ iştiraki ile matbuat konferentsiyası keçirilecek.
Matbuat konferentsiyası saat 11:00 «Ukrinform» agentliginde keçecektir.
Telekanalnıñ resmiy saytında yayınlavnıñ yañartıluvı aqta malümat şimdlik yoqtır. Qırımda telekanal hadimleri Kostınskıynıñ aytqanını izaatlamay.
ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete
Aprel 1-den dünyada yekâne ATR qırımtatar telekanalı, Rusiye litsenziyasını elde etalmayıp, yarımadada yayınlavını toqtattı.
Birazdan telekanalda şunı bildirdiler ki, ATR haber muarririyeti telekanal saytında aşkâr etilecek haber süjetlerini ve mahsus levhalarnı çıqarmağa devam ete eken.
ATR yayınlavınıñ toqtatılması ile cumhuriyet akimiyeti qırımtatar cemaat telekanalını teşkil etmek teşebbüsini bildirdi. Onıñ fikrine köre, bu kanal qırımtatarlarnıñ doğru malümatnı elde etmek aqqını teminler.
