Qırımda Krasnoperekopsknıñ rayon mahkemesi iyün 18 künü Küçük Mamçıq köyüniñ imamı Yunus Nemetullayevniñ işinde teneffüsni ilân etti, onı 2015 senesi mayıs 18 künü matem mitinginde iştiraki sebebinden qabaatlaylar.
Bunı Qurultaynıñ Merkeziy saylav komitetiniñ başı Zair Smedlâyev bildirdi.
Onıñ malümatına köre, Nemetullayevnıñ işi boyunca mahkeme toplaşuvı cumaaqşamı saba başlandı ve tezden toplaşuvda iyül 25 kününe qadar teneffüsni ilân ettiler.
Qırımtatar Milliy Meclis reisi Refat Çubarov mezkür işte teneffüsniñ sebebi – «iş şaraitleriniñ tafsilâtlı ögrenilmesi» olğanını añlattı.
Smedlâyev iyün 18 künü Krasnoperekopsk regional meclisiniñ başı Saniye Ametovanıñ işi boyunca mahkeme toplaşuvı keçirilecegi aqta da bildirdi.
«Saat 13:20 Ametova Saniye İsayevnınıñ işi baqılacaq. Ğaliba, bütün yerli mahkeme hızmetçileri politsiya hadimleri ile binanıñ qoruvında buluna», – yazdı o Facebookta.
Qırım uquq qoruyıcıları adet üzre bu malümatnı izaatlamay.
