Cemilev musulmanlarnı Ramadan ayı ile hayırlap, milletine yañıdan Vatanda birleşmege tiledi
Ukraina prezidentiniñ qırımtatarlarnıñ işlerinden vekâletlisi Mustafa Cemilev iyün 18 künü bütün musulmanlarnı muqaddes Ramadan ayı ile hayırladı.
Beyanatqa qayd etilgeni kibi, «ruhiy mükemmelleştirüv, deñiştirüvler ayıdır».
«Eyi niyetleriñizde muvafaqiyetler tileymiz. Tuvğan toprağımız Qırımda daa nice bayramlarğa beraber yetecegimizge ümütimiz bar, inşaAllah», – denile hayırlavda.
«Umma» Ukraina musulmanlarınıñ diniy idaresi evel ay devamında keçirilecek gece namazları aqqında bildirgen edi.
Qırımda iyün 18 künü Aqmescitniñ merkeziy Kebir camisinde Qırım musulmanları diniy idaresi tarafından teşkil etilgen birinci umumiy iftar keçirilecektir.
Ramadan muqaddes ayı devamında musulmanlar oraza tutmalı, yani kündüz aş ve suvdan vazgeçmeli. Orazadan ağırayaqlı ve emizdirgen qadınlar, yedi yaşqa yetmegen balalar, hasta ve qart insanlar, seyahatçılar boşatıla.
Evel bildirilgeni kibi, «Ukraina musulmanları Assotsiatsiyası» cemaat teşkilâtı «Qırımtatar cemiyeti» (Kiyev) ile birlikte Ramadan ayında Quran ezberlevi boyunca yarış keçirecektirler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
