Ukrainanıñ qıtaiy qısmında çalışacaq İçki işler nazirliginiñ Qırım Muhtar Cumhuriyeti boyunca qurulacaq mahsus idaresi qırımlılarnıñ aq-uquqlarını semereli qorçalamağa yardım etecek. Bunı iyün 17-de Ukraina halq deputatı Georgiy Logvinskiy bildirdi, – dep haber ete Qırım.Aqiqat.
Onıñ aytqanına köre, al-azırda idare erkânı şekillendirile.
«İçki işler nazirligini bu adımnı atması içün zorlamağa ne qadar qıyın olsa da, biz bir şeyge iriştik, al-azırda idare erkânı şekillendirile ve eñ yaqın vaqıtta onıñ işi başlaycağına ümüt etem... Bölük yolbaşçısı Odessa vilâyetinde Ukraina İçki işler nazirligi Baş idaresiniñ sabıq yolbaşçısı İvan Katerinçuk olacaq. Bu müim bir adım ve işğal qurbanları olğan qırımlılarımıznıñ aq-uquqlarını qorçalamağa yardım etecek bir alet. Çalışmağa devam etemiz», – dep yazdı Georgiy Logvinskiy Facebook saifesinde.
Ukraina İçki işler naziri Arsen Avakovnıñ bildirgenine köre, Ukraina İçki işler nazirligi Qırım Muhtar Cumhuriyeti boyunca mahsus idareni aça, bölük qıtaiy qısımda hızmet etecek.
