İyün 18-de Hersonda keçirilmesi belgilengen ekinci Baltiya-Qara deñiz iqtisadiyat forumında Qırımdan köçip kelgenlerniñ problemlerini muzakere etecekler. Bunı «Küreş» qırımtatar medeniyet-sport merkeziniñ yolbaşçısı İbragim Suleymanov Qırım.Aqiqat saytına bildirdi.
Onıñ aytqanına köre, forum çerçivesinde «Vaqtınca köçip kelgenlerniñ alışuvı» sektsiyası planlaştırıla. Sektsiya vaqtında Suleymanov mecburen köçip kelgen qırımtatarlarnıñ medeniy, etnik ve diniy hususiyetleri ile yañı içtimaiy şaraitler problemaları aqqında tarif etecek.
Bundan ğayrı, «Krım SOS» cemaat teşebbüsiniñ cenüp ukrain ofisiniñ reberi Vitaliy Zaharçuk ve diger teşkilâtlarnıñ vekilleri çıqışta bulunacaqlar.
Forum programmasına binaen, böyle sektsiyalar da çalışacaq: «Logistik kompleksniñ inkişafı», «İqtisadiyat inkişafınıñ müim faktorı olaraq energiya arttırması», «Ekologik havfsızlıq inkişafqa bir şart olaraq», «Turistik-rekretsion kompleksniñ inkişafı».
Forum iştirakçileri Baltiya memleketleri ressamlarınıñ sanat sergisini ziyaret etecekler. Forum soñunda «Kelecekke bir adım» VII Halqara festivali keçirilecek.
