Link açıqlığı

Qırımda «VKontakte» içtimaiy ağındaki saifesinde bir şey yazğan yerli sakinni natsizmde şekleyler.

Qırım prokuraturasınıñ matbuat hızmeti bildirdi ki, «İnternet» ağında milliy nefret ve duşmanlıq sebebi ola bilecek malümatlarnıñ tarqatılması boyunca cinaiy iş açılmasınıñ qanunğa uyması teşkerildi.

«İnternet qullanıcısı natsizm mefküresiniñ qafadarı olıp, «VKontakte» içtimaiy ağındaki saifesinde, ekspertlerniñ qararına köre, millet mensüpligine köre adamlarnıñ itibarını aşalağan, em de olarğa qarşı zorbalıq, duşman areketlerini aqlağan metn, ses ve fotoresimlerni yerleştirdi kibi qarar çıqarıldı», – dep aytıla haberde.

Prokuratura Rusiye Cinaiy kodeksiniñ 282-nci maddesiniñ 1-inci qısmı boyunca («İnternet» haber-alâqa ağı vastasınen millet mensüpligi boyunca insan ya da bir qaç insannıñ itibarını aşalağan nefret ya da duşmanlıq sebebi olacaq areketler) cinaiy işniñ açılmasını qanuniy olaraq tanıdı.

İlk taqiqatnıñ ketişatı ve neticeleri Qırım prokuraturası tarafından nezaret etile.

Qırımlını yüz biñden üç yüz biñ rublege qadar para cezası, ya da yüz seksen saatlik mecburiy işler, ya da bir yıllıq tüzetüv işleri, ya da eki yıllıq apis cezası bekley.

XS
SM
MD
LG