İyün 29-dan iyül 2-ge qadar Berlinde Rusiyede Qırımda teraktlarnıñ teşkil etilmesinde qabaatlanğan rejissör Oleg Sentsovğa qoltutmaq içün bir sıra ukrain kinolevhasını kösterecekler. Berlindeki ukrain kino künlerini ukrain kinoprodüsserleri dünyada ukrain medeniyetini populârlaştırmaq içün teşkil eteler, dep qayd etildi iyün 17-de Kiyevde olıp keçken matbuat konferentsiyasında, haber ete Qırım. Aqiqat mühbiri.
«Dünyada kinoindustriyamız, kinematografımız belli olsun dep, çoq çalışamız. Zenaatdaşımıznıñ taqdirine diqqatnı celp etmege imkânımız olğanda bu pek müim – Oleg Sentsov memleketimiz oğrağan qıyın vaziyetniñ reinesi oldı, kinoindustriyamız da bunı is ete», – dep ayttı Ukrainanıñ kino meseleleri boyunca devlet agentliginiñ yolbaşçısı Filipp İlyenko.
Teşkilâtçılarnıñ malümatına köre, festival çerçivesinde ukrain kinematografı içün müim olğan bir sıra levha kösterilecek. «Haytarma», «Paracanov», «Povodır», «Teni zabıtıh predkov – ögnennıye köni», «Vesnoy», em de zemaneviy vesiqalı filmler: «Maydan», «Babylon13: voyna» numayış etilecek.
Berlindeki ukrain kino künleri çerçivesinde Askold Kurovnıñ «Osvobodite Olega Sentsova» («Oleg Sentsovnı azat etiñiz») vesiqalı filmniñ iş versiyası ve Oleg Sentsovnıñ «Gamer» işi taqdim etilecek.
«Alman seyircisini ukrain kino ile tanış etmekten ğayrı semetdeşim Oleg Sentsovğa qoltutuv aktsiyası da keçirilecek, menim içün bu eki qat müim. Olegni tanıyım, yaqın dost degilmiz, amma o da qırımlı. Berlinde Qırımda çıqarılğan «Haytarma» da kösterilecek, levha Ukrainada yapıldı, menim içün büyük bir şeref ve müim bir vaqia», – dep ayttı rejissör Ahtem Seytablayev.
Festivalniñ teşkilâtçıları Almaniyanıñ meşur siyasetçileri, dünyanıñ farqlı köşelerinden diplomatlar, Avropa kinoakademiyasınıñ azaları, ukrain ve çetel kinosanayısınıñ vekillerini davet ettiler.
Berlindeki ukrain kino künleri çerçivesinde Ukraina musafirleri ve Almaniyanıñ medeniyet ve siyaset erbaplarınıñ iştiraki ile tögerek masalarnıñ ötkerilmesi ilân etilecek.
Oleg Sentsov 2014 senesi mayıs ayında Rusiye FSB hadimleri tarafından Qırımda yaqalanğan edi. Onı Aqmescit, Yalta ve Aqyarda teraktlarnıñ azırlanmasında qabaatlaylar. Sentsovnıñ adliyecisi SİZOda onı çekiştirgenlerini bildirgen edi. Rejissör qabaatını red ete. Bundan ğayrı, bu iş boyunca daa üç kişi yaqalandı.
Aprel 16-da taqiqat ukrain rejissörini «silânı qanunsız tutuvda» da qabaatladı.
Moskvanıñ Lefortovo mahkemesi ukrain rejissöri Oleg Sentsovnıñ apis müddetini mayıs 11-ge qadar arttırdı.
Sentsovnıñ bir çoq işdeşi ve uquq qorçalayıcılar onı siyasiy mabus olaraq tanıp, onı azat etmege çağıralar. Olarnıñ fikirince, Sentsovğa qarşı qabaat sahte ola. Sentsov – Euromaydannıñ faal iştirakçisidir.
