Bazarertesi künü, iyün 22-de, Kiyevde «Mecburen köçip kelgenlerniñ birligi» («Soyuz vınujdennıh pereselentsev») ve «Tavriya gumanitar platforması» («Tavriçeskaya gumanitarnaya platforma») işğal etilgen Qırımda etnik ukrainlerniñ aq-uquqları bozulğanınen bağlı meselelerni muzakere etmek içün tögerek masanı keçirmege planlaştıralar.
Tedbir Ukraina Amerika Qoşma Ştatları Elçihanesiniñ demokratiyağa yardım fondunıñ qoltutuvı ile teşkil etile.
Teşkilâtçılarnıñ malümatına köre, tedbirde Ukraina Yuqarı Radasınıñ insan aqları ve serbestligini qoruv işlerinden vekâletlisi Valeriya Lutkovska, halq deputatları, cemaatçılar ve uquq qorçalayıcılarnıñ iştiraki beklenile.
Tedbir saat 11:00-de B.Hmelnitskiy soq. 8/16 adresi boyunca Ukrinform agentliginde başlaycaq.
Kiyev patriarhatı Ukrain ortodoks kilsesiniñ Aqmescit ve Qırım Arhiyepiskopı Kliment dünya toplulığını Qırımda yaşağan Ukraina vatandaşlarınıñ milliy, medeniy ve diniy aq-uquqlarını qorçalamağa çağırdı.
Uquq qorçalayıcı teşkilâtlar, şu cümleden halqara teşkilâtlar Qırım Rusiye tarafından işğal etilgen soñ yarımadada ukrain ve qırımtatarlarğa basqı yapılğanını qayd etken ediler. Qırımnıñ şimdiki akimiyeti bunı red ete.
