Ukraina Haber siyaseti naziriniñ keñeşçisi Sergiy Kostınskıy ATR qırımtatar telekanalı yayınlavınıñ Kiyevde yañartılacağı aqqında bildirdi.
Onıñ malümatına köre, bu mevzuda iyün 18 künü Ukraina paytahtında telekanal saibi Lenur İslâmov ve Qırımtatar Milliy Meclisiniñ reisi Refat Çubarovnıñ iştiraki ile matbuat konferentsiyası keçirilecek.
Matbuat konferentsiyası saat 11:00 «Ukrinform» agentliginde keçecektir.
Telekanalnıñ resmiy saytında yayınlavnıñ yañartıluvı aqta malümat şimdlik yoqtır. Qırımda telekanal hadimleri Kostınskıynıñ aytqanını izaatlamay.
Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.
